Sermon Theology

Jesuh Thisen I Lak Ve

Written by Sang Uk Cung

Baibal: Hebru 9:22 “Nawlbia ning ahcun zei paohpaoh hi thisen in thianh a si i, sualnak hi thisen luanh lawnglawng in ngaihthiam a si”.

Biahmaithi

Voikhat ah John Wesley (1703-91) cu pumhnak in a lawi pah ah miṭhalo pakhat nih a phaisa a chuh. Phaisa tlawmpal te le thawngṭha a chimmi catlap pawl aa tel chih. Miṭhalo pa cu a tli thluahmah i, cu lio ah John Wesley nih a hei dawi ve i, ‘ka kawi, um rih. Tlawmtuk lawng na ka chuh. Tamdeuh in kan pek rih lai,’ a ti. Mipa cu lau nawn in, lung awṭawm nawn in a um lio ah, John nih a hei phanh i, ‘Ka kawi, ziah vawlei cung herhbau ca lawng ah thil na chuh hna, zungzal caah pei na herh deuh cu. Jesuh Khrih thisen nih na sualnak vialte an thenh dih cang, cucu nai lak chih a hau,’ tiah rianrang nawn in a chimh ta i John nih a tlik tak diam ve, ti a si.

Kum sau nawn hnuah John Wesley cu khua pakhat ah thawngṭha a chim i a dihhnu kuttlaihnak ah mirum ngaipa pakhat nih a kut a hong tlaih pah in, ‘Na thil a rak in chuttu miṭhalo pa kha ka si, na ka pekchihmi Jesuh thisen nih a ka thlen caah na cungah ka lawmtuk. Ka nunnak ah nangmah cu leiba nganpi kan bat ko, a tu cu Bawipa nih rumnak zong a ka chap chih cang e,’ tiah a ti.

Exodus 12 chungah thisen biapitnak:

Ule nau hna, Israel mi hna sal i an can lioah khan sifak le rethei ngaingai in an rak um ko. Uktu hna kut in hremnak a phunphun an ing. An hmape le tukvelhnak hma vialte nih an thinlung a fakter ko hna. Nilin lakah rian hrang an tuannak ah an thazang a dih cikcek. Taksa thinlung in an ba hringhran. Kum saupi cu bantuk dirhmun i an umnak nih an cungah harsatnak le derthawmnak tampi a chuahpi fawn. An hna bei a dong cikcek ko lai.

Zankhat cu an cungah thil khuaruahhar mi a tlung, Lanhtak puai zan ah. (Exodus 12). Tuufa thisen kha an innka ba le innkatung i an thuhnak thawng in Pathian zohkhenhmi ah an hong cang.  Pathian nih a chimh hna bang in, innchung ahcun lanhtak tuufa sa emmi cu an ei fawn. Cuticun tuufa thi le sa cu an nun ah a hong lut.  A zaw a fakmi an um zong ah, pum tlamtlinglo an um zong ah, mitcaw kebei kutzeng kezeng an um zong ah tuufa sa emmi te cu an ei ve ṭheu lai. Lenglei innka zong ah thisen cu nehdih, nalh dih a si ko lai.

An tuanbia ṭialtu pakhat nih a ṭialmi cu, “Chungkhar khat hna cu fa upa pathum an um. A pu he, a pa he, a tu he fa upa lawngte an si. Cucaah a pu nih an ih lai tiangah innka ba le innka tung kha a zohter ṭhan hna i, thisen aa neh le nehlo, a loh hna a lo sual maw, a pingpang hna ah an nalh sual maw tiin a zohpi hna i, thisen cu nehdih a si hrimhrim ko ti ai fian hnu ah an it kho e” ti a si. Cuticun zinglei a hong chuak i, thil aa phundang cang. Sal dirhmun siti loin, miluat dirhmun an si cang. Damlo mizaw mifak mi, le sifak rethei an si ti lo, thilri chawva suingun he dam ngai le lunglawm in an chuak cang. Bawipa nih Izip mi cu Israel mi cungah hmaizahnak a ngeihter hna i, an halmi paoh kha an pek hna. (Exodus 12:35-36) Cucaah thilri tampi, sui le ngun tampi kha an pek hna ti cu fiang tein kan hmuh khawh.

Tuufa thi le sa nih  zankhat ah an nun cu a thlen ko dah ngai!  An dihlak in a ṭhawngmi, a dammi, a rummi ah an i chuah. Sal le santlailo si ti loin Bawipa ralkapbu (Ex.12:41) tiah auh an si cang. Amen.

Jesuh Thisen Hmual:                                        

Jesuh thisen cu a mak lawlaw, zungzal a hmunmi thisen, caw thi le tuu thi le meheh thi nakin a sunglawi deuh i, minung nunnak a cawtu khotu, a thlengtu, a khamhtu, sual a ngaihthiam khotu le a thianter khotu, a kan humzual zungzal khotu thisen a si.

Kan Bawipa Jesuh ngaknu thiang chung in a chuah channak hi sullam a ngei. Joseph thi aa tello i, cunglei Pathian thi in hrinmi a si. Cucaah Jesuh cu Pathian thisen kengtu a si i, Jesuh thisen cu Pathian thisen, zungzal a hmunmi thisen hrimhrim a si.

Cucaah Jesuh thisen cu hmual a ngei. Zeibantuk hmual dah a ngeih tiah cun, chunglei in a kan eihmuartu sual thurhnawmhnak vialte a kan ngaihthiam i, a kan thianh khotu hmual a si. Jesuh nih a chimmi cu “..hihi ka thi a si, biakam fehternak thisen, sual ngaihthiamnak ca i mi tampi ca i thletmi cu a si’ (Mt. 26:28) ‘a ti. .a Fapa Jesuh thisen nih kan sualnak vialte in a kan thianh’ (1 Johan 1:7). ‘Nawlbia ning ahcun zei paohpaoh hi thisen in thianh a si…’ a ti (Hebru 9:22).

Cucaah Vailam cung thisen lo in Khamhnak a um lo, Damnak aum lo, Ruahchannak le zungzal nunnak aum lo.  Nifa thiltha na tuahnak, mitha na sinak nih an khamh kho lai lo, Khrihfabu rian na tuannak nih an khamh kho lai lo… Vailam cung thisen lawnglawng in ngeihthiamnak le Khamhnak a um (Hebrew 9:22, Lev. 17:11)

Donghnak

Voikhat ah mi pakhat nih, “Jesuh thisen cu sual thianhnak hmual a ngei nan ti, zohhmanh u, vawlei cung minung an sual peng ko ṭung?” tiah bia a hal. Aw..sitak e…, Vawlei ahhin kan takpum khawlhnak ah sahpiat tampi an ser ko nain a thurhnawmmi an tam lengluang ve ko. Zeicahtiah sahpiat ṭhawnnak an hngalhlo caah a si. Sahpiat cu kan pawngte ah i chiah hmanh usihlaw, kan i thuh hlan lo cu kan thiang hlei lai lo. Sahpiat sernak hmanh ah rianṭuan usihlaw kan thiang hlei lai loh. Thian duh ahcun sahpiat kha i lak i, i thuh ve i kan thiannak ah hman a hau” tiah an leh.

Cu bantuk te cu a si. Jesuh thisen cu zumhnak in kan i lak hnu lawngah rian a ṭuan. Kan zumh lo chung paoh cu kan thiang hlei lo. Cucaah zumhnak in i lak ve tik lawngah khuaruahhar in rian a ṭuan taktak ve.

Hebru 9:22 chung zong ah zei paohpaoh hi… a ti khah. Zei paohpaoh timi ah hin kan nunnak dihlak aa tel. Zei paohpaoh hi Jesuh thisen in kulh ding, tuam ding le humzual dingah a kan hmuhsakmi a si.

Ule nau, Jesuh thisen cu Pathian thisen a si i, sual ngaihthiamnak le khamhnak, thianhhlimhnak le humzualnak hmual le huham a ngeimi a si. Zumhnak in kan cohlan or i lak tikah kan nunah Thiang Thlarau hmang in rian a ṭuan cuahmah ko.

Thiang Thlarau nih fiannak in pe ko seh.

Rev. Sang Uk Cung

 

About the author

Sang Uk Cung

I am very interested to support the empowerment for the persons with disabilities in Myanmar.

Leave a Comment

This site uses Akismet to reduce spam. Learn how your comment data is processed.