Sermon Theology

“Na tuhmi cu na zun ko lai” Galati 6:7-9

Baibal relnak:

Galati 6:7-9, “Nangmah le nanmah kha I hleng hlah uh; a hohmanh nih Pathian cu a deh kho lo. Mi nih a tuhmi cu a zun ko lai. A pumsa duhnak lo a a tuh ahcun Thihnak kha a zun lai; Thlarau lo

ah a tuh ahcun Thlarau nih zungzal nunnak kha a pek lai. Cucaah thatnak tuah kha baa hlah u sih; kan ngol loahcun a theitlai kan zun caan kha a phan ve ko lai”.

Tiluk ram Republic ah hmasabik hruaitu khrihfa minthang a simi nu, Madame Chiang Kai-shek (March 5, 1898 – October 23, 2003 (kum 105)nih a chimmi cu, “A liamcia thil a cangmi nih  a tu caan minung kan nunnak ah thil tampi a kan chimh caah nifa kan cawlcanghnak vialte hi a biapi tuk. Tiluk rammi nih chim tawnmi bia kan ngaihmi cu, “Mipa pakhat nih zil a cin ahcun zil a zun ko lai I, bete a cin ahcun bete a zun ko lai.”  Hihi a hopoah nih kan nun ah a lang zungzal.Thiltha na tuahmi nih thlitha a chuapi I, thiltha lo nih ningzahnak a chuahpi.” tiah bia pakhat a rak chim bal. U le nau hna  ni hin ah zeibantuk na si cu nizan na tuahmi theipar a si ko.

Phungthluakbia 11:24, “Mi pakhat nih siangte in a thenh lengmang I a rum chin, a dang pakhat nih tinsih in a um I herhbaunak lawng kha aa miak ko”. tiah kan hmuh.  Abraham cu fa ngei kholo in lungre thei ngai in thlam innka I a thut lioah khan khua a hei zoh I, mipa pathum an dir kha a hmuh hna. A hmuh hna le cangka a va tli I a va don hna. A khup aa bil I, “ Bawipa, ka inn ah tangta loin kei santlailo pa hi ka lanhtak sawh hlah. Ti in cahpiak hna ning law  nan ke I tawl u law thing toiah hin I din ta u. Rawl tlawm pal tein in serpiak hna ning law ei ta u law cun nan bat a dam in nan lan te lai. Ka inn nan ra phan cang tung I, raw lei ta lo cu ka sia a herh,” a ti hna( Gen.18:1-5). Abraham nih khual cungah thil tha a tuah ruangah Pathian thluachuahnak kha an pek i nuphung hmanh a thei tilomi tarnu Sarah nih fa a pawi ni fapa Isak a hrin ko.( Gen.21:1-7). Hi tuanbia nih a kan cawnpiakmi cu Pathian min in zei thil poah midang cungah kan tuahmi nih hin Pathian nih kan caah kan herhning in a thluachuah hi a kan pek peng ko ti hi zumtu mi hna nih kan philh lo awk a si.

Zarenfath nuhmei nu hi sifak tukmi a sinak cu an ei awkah changvut pei khat lawng  a ngei I, thawl chungah chiti tlawmte lawng lawng a ngei pinah cu chunnak ah thinghreu pahnih thumte lawng an ngei I, cu kan ei dih cun kan thi ko lai titian in profet Elijah  a rak ti. Sihmanhsehlaw cu hnuhmei nu nih a ngeihmi te cu a fapa he ei sianglo tein Pahtian riantuantu a simi Elijah cu a ei ter tikah  bawipa Pathian nih changvut um cu a lawng terlo I, chiti thawl cu a reu ter lo.( I siangpahrawng 17:8:16).zungzal an khimnak tu ah a cang ai. Halelujah!  Mi tampi cu kan harnak lawng kan ruahnak nih hmailei thluachuah a kan phih tawn. Pathian bochan in kanmah sinning I zoh loin Pathian nih zeidah siter a kan duh timi tu a zoh hmasami hna nun ah a dong catlomi thluachuahnak a tlung I, zungzal in a dong tilo in thluachuahnak a co zungzal.  Matt. 7:18, “A ngan a dammi thing kung nih theichia a tlai kho lo I a kung a tha lomi nih theitha a tlai kho ve lo”. Tiah kan hmuh bantuk in kan nih cu kan zumhnak ah a ngan a dammi kan si le si lo cu kan theipar in a lang peng ko ti hi philh lo awk a si. Khrihfami tampi cu kan khiar tuknak ah tonlo ding le tonlo dingtu kan ton tawn.

Ananias le a nupi Safira cu sifah an tih tuknak ah lo man an hmuhmi tangka kha tlamtling in tein thawhlawm an pe duh lo i lih in a pek caah an chawva cu chimlo in an nunnak tiang in a liam ai. (Lamkaltu 5: 1-11).  Mi tampi cu Pathian chawn a simi kan cheuhra cheukhat hmanh hi kan khrihfabu ah thlamtling tein pekduh loin kan um ruangah hin kan innchungkhar ah thluachuah tlam tling a kan hmuh ter tawn lo.

Hosea 8:9, “Isreal mi nih thli an tuh I phuchim an zun”. tiah kan hmuh. Cu lawng silo Pathian salpa Job nih cun Job 4:8, ah “Keimah ka hmuhning ahcun thatlonak lei a thuangtu hna le Harnak a tuhtu hna nih cun, cu thiamthiam cun an zum tawn.” tiah a ti.   Hlen a hmangmi Jacob kha a nun chung an hlen ve. Apu laban nih voi hra len.(Gen.31:7). A fale nih Joseph a thi tiah kan hlen. (Gen.37:32-35). Jacob nih a pa a hlen ruangah a nung chung vialte zeitluk lungre thei in dah a um. A upa Esau a thih tuk i a pu Laban sinah a zam(Gen.27:43-45). A tar tiang lungretheihnak in a tuarpeng( Gen.42:1- 44:1-34 ). Hlen a hmangmi Jacob nungnak cu a chan chung hlen vemi pa a si ve ko. Jacob nih a tuhmi cu a chanchung in a zun ve ko.

Hringtu pa chimh a ngailomi  tlangbawi Eli fapa le hna bantuk in, nu le pa sualnak lawng ruah in  mifanu sualnak lawng a tuahmi hna cu Pathian chiatsernak an tong ve I, an pa rian hmanh chawng kho ve loin an chan tim hlan ah ral kut in an thi ve.(ISam2:22-24). Na nuning kha thatte in i ruah tuah. Na nunning kha tha tein I ruat tuah. Nun thlah thlam in nu le pa sualnak lawng a ruatmi na si ahcun  a roh hlan hrimhrim ah na in turmaar colh ko lai.

Pathian nih Israel miphun  tungtu dingah fa a ngeikho tilomi minu  Manoah chungin fapa Samson a pek hna. Samson nih a thawnnak le a fimthiamnak cu pumsa diriamhnak a simi  hlawhlangnu menmen  le miphun dang nu Delilah diriamhnak menmen caah a hman caah a chantim hlan ah thih thalo tuk in a thi ko kha.(Biaceihtu 13:16 ). Phungthluakbia 22:8, “Dinlonak thlaici khan a tuh ahcun harnak khan a zum lai I, na rian theitlai cu fungfek kha a si lai” tiah kan hmuh bang, Pathian sin in kan thawnnak le thazaang hna hi Pathian sunparnak siloin vawlei pumsa diriamhnak men ah kan hman ahcun chi khat teah a theipar kan zun ve ko lai. Na nunning kha rak I ruat tuah!

Rahab a min a simi hlawhhlangnu nih  a si khawh tawk tein Isreal mi ral kap a zoh khenh hna caah Jeriko a cimh lio ah lutnak  kan hmuh( Joshua 2) bantuk in, ni hin thiltha kan tuahmi nih hin thaizing ah thluachuah theipar kan zum ko. Salm 126:5-6, “Mitthlia he thlaici a tuhmi nih, lunglawmh aunak he an zun lai; Tah buin thlaici aa phorhmi hna nih lunglawmhnak hlasa le facang phal I put in an ra kir lai!” tiah kan hmuh bang ni hin ah hin mibawmhnak ding caah sihfah tuar hmanh  usih law thaizing ah kan caah lunglawhnak nih ah a can ter zungzal ko lai.

 

“Thlitu le nikhua an that tiang na ngan peng ko ahcun, thlaici zeihmanh na tuh bal lai lo I zeihmanh na zun bal pek fawn lai lo”(Phungchimtu 11:4) tiah kan hmuh bantuk in a tu kan caan hi thaizing  caah kan hrampi  a si. Cucaah thatnak tuah kha baa hlah usih; kan ngol lo ahcun a theipar kan zun caan kha a phan ve ko lai. Cucaah a caan kan ngeih fate, mi cungah thatnak tuah kha I zuam u si.( Galati 6:9-10). Na tuhmi cu na zun ko lai.

 

About the author

Sang Uk Cung

I am very interested to support the empowerment for the persons with disabilities in Myanmar.

Leave a Comment

This site uses Akismet to reduce spam. Learn how your comment data is processed.