Sermon Theology

Khamhnak Dingah Minung Nih Zei Tuah A Herh? (Part. 3)

Written by Sang Uk Cung
  1. Lawmhnak taktak A Kawl

Pathian sin lawmhnak taktak kawl duhah Jerusalem biakinn ah Pathian biak awk a kalmi pa, Ethiopia tilditpa cu Pathian bia a rel lengmang ko nain daihnak taktak a hmu kho lo nain Bawipa vancungmi pakhat nih Filip cu chimh dingah an fial i, Filip nih a fainter hnuah a kal tak colh nain lunglawmhnak in a khat. (Lam.8:26-40). Hi lunglawmhnak hi lawmhnak taktak, sui le ngun zong nih cawk khawhlomi lunglawmhnak cu a ngei.

  1. Thiltha Lo le Sual Kha Huat A Herh

Joseph nun kha na ruat bal maw? Chronology of the good Samaritan Bible chungah Joseph chuahnak kum hi BC 1746 ah a si i, Izip i an zuar hi BC 1728 ah a si. Kum 16 bak a si. Nulepa umlonak ah kum 16 mino te nih ai bochan pengmi cu Bawipa Pathian kha a si.  Vawlei Pumsa diriamhnak le nule pa sualnak nih a nunzia a hrawk kho lo. Zeibantuk a ton ah siseh, khawika hmun a um zongah siseh, Pathian ka sinah a um ko (Emmanauel) ti kha a philh bal lo ( Matt.1:23f) Cu bantuk mi hna cu harnak tampi tong hmanhsehlaw a donghnak taktak ahcun khuaruahhar in thluachuahnak an hmu. BC 1716 (kum 30) a si ah Izip ram vialte ah min thatnak laksawng a hmu ko (Gen.41:37- 46). A hnu ahcun a unau vialte le khua ram vialte mangtam luattertu bak a si. U le nau hna nifa na nunak ah Pathian ka sinah a um ko na ti kho maw? Khamh ka fian hnu ahcun Nu paw cung ka bawmh zong ah ka khamhnak a tlau lo ti cawnpiaknak deu he cun aa ral kah. Khamhnak a tlau lo ti riangmang i duhpoah in nung lai ci. Hell lam a si. I ral ring!

  1. Pakhat le Pakhat Cungah Dawtnak Ngei A Herh

Bethlem khuami Naomi le Elimelek hi mangtam ruangah Moab ram ah an pem. Fapa pahnih an ngeih hna. A fapa pahnih nih cun Naomi le Orpah an thit hna. Vanchiat ah hringtu anpa Elimelek le an fapa pahnih nih an thih tak hna. Naomi cu an semnak ah kir than ding ai tim.  Noami nih cun a fapa le nupi hna cu a thawh hna i, “Va kal cang u, nanmah le nan nu le na pa inn tangah khan va kir cang u. Nan pahnih in va inn tangah khuasaknak nan ton khawhnak bawipa nih thluachuahnak in pe ko hna seh a ti hna (Ruth 1:8-9) Orpah nih cun a pi cu a hnamh, sihmanhsehlaw Ruth tu nih cun aa tlaih peng (Ruth 1:14). Na kalnak ah ka kalve lai i na riahnak ah ka riak ve lai; na miphun cu ka miphun a si ve lai i na Pahtian cu ka Pathian a si ve lai; na thihnak ah ka thi ve lai i khi ka ahcun an ka vui ve ko lai tiah a pi cu a ti.( Ruth 1:16-17)”.

Zumhtlak nusal tha Ruth cu Pathian nih a hnuah pasal tha Boaz a pek. Fapa an hrin i Obed  a si. Obed cu Jesse pa a si i Jesse cu David pa a si. David ciruang in Jesuh a chuah caah Jesuh hring sortu nu ah a cang ai (Ruth 4:1-22). Hi tuanbia nih kan khrihfa nun ah a kan cawnpiakmi cu kan pasal nu le pa, kan nupi le nu le pa hna hi kan upat hna awk le kan dawt hna awk a si. Zumhnak mit in kan zoh ahcun Pathian caah zumhawk tlak in a nunmi nu saltha cu Pathian nih a cawi san ko hna ti hi, hi tuanbia nih a kan cawn piak. Khamh ka fiang ti tung i pasal le lawng duh i, pasal le nu le pa a daw lo nu kan tam tuk. Hell lam a si. I ral ring.

  1. Thlacam Nun An Ngei

Hringtu pale hna nan fale caah zeitindah nan can nan hman? Job hi Uz ram mi a si. Fapa 7 le a fanu 3 a ngeih hna. Mirum tuk a sinain a fale caah zingka tein a tho i an milu tlingte in khanghthawinak a pek chanh tawn hna; zeicatiah Job nih cun a thawh i, “Kafa le hna nih hin sualnak an tuah ko hnga i an lung chungin Pathian kha an vawlhpamh ko hnga,” tiah Job cu a fale caah thlacamnak a tuah lengmang ( Job 1:5).  Hringtu pa tampi cu kan fale caah thlacam hi kan tuah bal lo. Ram thangcho i a ummi ko hi kan i manhlo tuk nan ti lengmang nakah nan fale caah thlacam cu chimh lo chungkhar pumhnak hman can a pelomi nan tamtuk. Kan tha ba ti i zu le beer din bu in zeitindah nan fa le cu an that khawh lai. Na nunning hi na fale caah tih a nungtukmi dirhmun a si sual maw? Job nih mirum tuk a si nain a fale caah zingka tein a tho i a fale caah thlacamnak a ngeih peng bantuk in nu le pa hna nih nan fale caah thlacamnak kan ngeih peng awk a si.

  1. Zumhtlak Nun Ngeih A Herh

Daniel 6:4 ahcun, “Khi tikah vuanci pawl le mangki bawi hna nih khan Daniel nih ram a ukning sual kawl khawhnak ding caah lam an kawl, sihmanhsehlaw thil thalo a tuahmi kha pakhat hmanh an hmu kho lo, zeicah tiah siangpahrang nih a fialmi kha fel tein a tuah” tiah kan hmuh. Pathian fale hna nih cun khawika kan umnak le rian kan tuannak hmanh ah Daneil bantuk in zumhawk tlak si kha kan i zuam peng awk a si.

  1. Nun In Cawnpiak A Herh

Lois hi Timote a pi a si i, Zunis hi Timote a hringtu a nu a si(II Tim 1:5a). Pawl nih Timote sinah ca a hei kuat chungah, “Na pi Lois le na nu Zunis nih an ngeihmi zumhnak bantuk, zumhnak taktak  na ngeih kha ka hngalh i a tu zongah hin na ngeih ko tiah ka zumh” a ti( IITim 1:5). Tlangval note a simi Timote a zumhnak hmanthlak cu hringtu a nu le a pi  nih an zumhnak hmanthlak a si. Hringtu nu tampi nih kan fale tha hna seh ti cu kan duh ngai nain zumhnak lei ah tamtuk kan rak chambau. Pumh hmanh huam lo buin zeitin dah kan fale cu an that khawh lai. I ral ring!

  1. Donghnak

Jesuh nih, “Nal profet kha i ralring hna u, nan sin an rat ah cun tuu bantukin an i umter, sihmanhsehlaw an chunglei cu cenghngia hrang an si. Annih cu an theitlai khan nan rak hngalh ko hna lai. Khohmung nih mitsur thei a tlai bal lo i saihmurhling nih theipi a tlai bal lo. A ngan a dammi thingkung nih thei ṭha a tlai i, kung chia nih thei ṭhalo a tlai tawn.  A ngan a dammi kung nih theichia a tlai kho lo i a kung a ṭha lomi nih thei ṭha a tlai kho ve lo. Thei ṭha a tlai lomi cu hau i mei chung i paih an si tawn. Cuticun nal profet hna cu an theitlai khan nan hngalh ko hna lai. (Matthai 7:15-20). Chim ka duhmi cu zumhnak a ngeimi cu an nun theipar in thieh khawh an si.

Thiang Thlarau nih fiannak in pe ko seh.

Rev. Sang Uk Cung

 

 

 

About the author

Sang Uk Cung

I am very interested to support the empowerment for the persons with disabilities in Myanmar.

Leave a Comment

This site uses Akismet to reduce spam. Learn how your comment data is processed.