Tech

Mah le mah i thah hi “ralthat” a si maw?

Written by Sang Uk Cung

Tuanbia tial thiampa, William Shakespeare nih a tialmi, “Romeo and Juliet” kong le video ruangah mino tampi mah le mah i thahnak a rak karhter ngaingai. A ruangah cu kha bantuk kha mi raltha ngai ah an ruah hna.Aung San Suh Kyi nih “ Ralthat” a timi cu a dikmi, a hmanmi kong ah biatak tein dir ngam, thil diklomi cungah doh ngam hi ralthatnak ah a sangbik a si” a ti. Ka lung a tling tuk hringhran.

Hri i awh, mah le mah nam in i sawh, zuru in thih cu ralthat a si lo. Hruh a si. U Ko Ni cu kawlram uknak 2008 upadi kongah raltha ngai in a hmanlonak a chim ngammi a si caah ruah lo piin January 29,2019 zaanlei 5:00 hrawngah Indonesia ram in a tlun ni ah Yangon airport ah meithal in an kah i a thi. Mi thattu pa a zaam lio ah Taxi mawngtu pa, Pu Ne Win nih meithal aa kenmi pa cu ral tha tak in a dawi i, tlakrawh ai lak i a cheh. Mi thattu pa nih Pu Ne Win cu a meithal in a kah i a thi ve.

A hmanmi, a dikmi ruangah Meithal aa ken ko mi, tlakrawh i lak zau i dawi ngam ruangah a nunnak a liammi pa, Pu Ne Win cu kawlram mi zapi lungthin a khehkhuai caah a thih takmi a nupi le a fale vialte cawmnak dingah mi tampi nih phaisa an pek hna, kawlram Bank tampi laksawng tampi an pek hna. “Ralthat” cu a pawngkam ah biatak, thil dik, thil hman a dirpi ngammi khi an si ko ka ti.

Adam mi ralchia a sinak cu a nupi sualnak a tuah lioah a zoh sawhsawh, a doh lo, a el zong a el lo, a tuahmi tu kha a tuahpi ve (Gen.3:6). Zumtu tampi cu “ralchiatnak or ttihnak” nih sualnak ah a kan hruai zungzal. Sifah ttih, min chiat ttih, midang ttih, thangchiat ttih, etc. ttihnak nih Pathian muisam kan lawhnak a hrawh tawn.

Pathian nih cun ttih hlah! a kan ti(Isaiah 41:10, Joshua 1:9). Biatak, bia dik, thil hmanmi mi doh ngammi kan si a herh.  Nathan nih siangpahrang David a sinak kong (2Samuel 12) kan rel tikah zei tluk in dah Pathian a bochanmi zumtu an ral a that. Siangpahrang ttih a nung tukmi kha biatak le biahman ruangah a sik le a cawnpiak ngam.

Mah le mah i thah cu mihrut an si. An thih tikah vawlei nih a hngal hna lo. An thih ni in a tuanbia thangchiatnak in a donghter. Sihmanhsehlaw Zumtu tampi cu thil dik le thil hman le bia dik chim ngammi, doh ngam, tuah ngam ruangah an thih nain an thih ni in caan dong tiang vawlei nih an tuanbia dawh chim peng le rel peng an si.

Pathian nih biatak nunnak caah thluachauhnak kan pe piak ko she. Amen.

 

Re. Sang Uk Cung

 

About the author

Sang Uk Cung

I am very interested to support the empowerment for the persons with disabilities in Myanmar.

Leave a Comment

This site uses Akismet to reduce spam. Learn how your comment data is processed.