Tech

“Dawhnak” kan timi cu? by Rev. Sang Uk Cung

Written by Sang Uk Cung

“Dawhnak” kan timi cu? 

Dawhnak hi minung pakhat a dawh tuk kan timi lawngah a dikbik le a hmanbik timi a um khomi a si lo. Zeicatiah ”dawhnak” timi cu a hmutu pumpak cio “mit” nih a hmuhning le a thinlung nih a cohlan ning cio a si.

Greek mifimpa Plato nih ”Dawhnak cu a hmutu mit cungah aa hngat” a timi hi a hmang tuk. Cucaah Mother Teresa nih, “Dawhnak cu minung kan hmaithlak ah silo in kan thinlung ah a si” a ti ve.

Voikat cu ram pakhat ah zuk suai zuamnak a um i an zuk suai dingmi tlangtar cu “Kut Dawh” ti a si. Mi tampi nih minung kut kha dawh taktak in a suaimi an um. Anmah le ruahhnak cio in zuk cu an suai cio. Cu lioah pakhat pa nih a suaimi cu, “Minung sifak harsa taktakmi mider ngaimi nih changreu a kut in aaput i a mah nakin a sifak deuhmi, rawltam tihal ngaimi pa a peknak liomi kut” kha a suai. Cu zuk cu pakhatnak “Kut Dawh” laksawng a hmumi cu a si. Sifak ngai kan si zongah kanmah nakin a har deuhmi hna thil kan va hrawmhmi hna, kan va pekmi hna kut te khi a dawhbikmi “Kut” a si ko rua.  Rom10:15b ahcun, “Thawngtha chimtu hna ke cu a vaa dawh dah a ti bantuk khan a si taktak” tiah kan hmuh ve.

Cucaah 1peter 3:4-5 chung zongah, “lenglei tamhnak, nan sam phiarning tehna, nan thi nan hlawn tehna, nan thil nan thuam tehna ah khan nan i dawhnak cu a um awk a si lo, nan i dawhnak cu nan chung muru ah aum awk a si i cu nan i dawhnak cu a tar kho lomi nemnak le daihnak lungthin, Pathian mit hmunh i a sung bikmi thil a simi kha a si. Pathian a rak i bochanmi nu hna cu, cu bantukin an i dawhnak a simi an si- an vale nawl an ngeihnak ah khan an i dawhnak a si” a ti.

Hi sullam cu lenglei a langmi dawhnak nakin chunglei a ummi ”Thinlung le nunzia dawhnak” kha a biapi deuh ngai in baibal le mi fimmi hna nih cun a kan chim duhmi a si.

 

About the author

Sang Uk Cung

I am very interested to support the empowerment for the persons with disabilities in Myanmar.

Leave a Comment

This site uses Akismet to reduce spam. Learn how your comment data is processed.